अभिनेता समीर शर्माको आफ्नै घरमा शव भेटियो, आत्महत्या गरेको पुलिसको आशंका

काठमाडौं, १६ भदौ । भारतीय टीभी अभिनेता समीर शर्माको मुम्बईको मलाडस्थित आफ्नै घरमा शव भेटिएको छ । प्रहरीले अभिनेता समीरले आत्महत्या गरेको आशंका गरेको छ ।

४४ वर्षीय अभिनेता समीरले ‘क्याँकी सास भी कभी बहु थी’, ‘कहानी घर–घर की’ र ‘ये रिश्ते है प्यार के’लगायतका टीभी सिरियल्समा काम गरिसकेका छन् ।

एक पुलिस अधिकारीका अनुसार गत बुधबार राति नै समीरको आफ्नै फ्ल्याटमा शव भेटिएको हो । मलाड पुलिस स्टेशनका सिनियर इन्स्पेक्टर जर्ज फर्नान्डिजले भने, ‘यहाँबाट उनको कुनै पनि सुसाइड नोट भेटिएन । उनले दुई दिन पहिल्यै आत्महत्या गरेका शंका गरिएको छ ।’

उक्त विल्डिङको वाचम्यानले किचनको प्वाँलबाट शव देखेपछि अभिनेता समीरको मृत्यु भएको हल्ला चलेको हो । त्यसपछि उक्त वाचम्यानले सोसाइटीका सबैलाई एलर्ट गरेका थिए ।

त्यसपछि उनीहरुले पुलिसलाई खबर गरेका थिए । त्यसपछि समीरलाई तत्काल अस्पताल लगिएको थियो, तर अस्पतालले मृत घोषणा गरेको बताइएको छ ।