बलिउड अभिनेत्री उर्वशीको फेसबुक ह्याक !
काठमाडौं, १३ बैशाख । बलिउड अभिनेत्री उर्वशी रौतेलाको फेसबुक अकाउन्ट ह्याक भएको छ । शनिबार अभिनेत्री उर्वशी आफैले ट्वीट गर्दै आफ्नो फेसबुक ह्याण्डल ह्याक भएको जानकारी गराएकी हुन् ।
उनले प्रशंसकहरुलाई आफ्नो फेसबुकबाट आउने पोष्टको जवाफ नदिन आग्रह गरेकी छन् । उनले ट्वीट गर्दै भनेकी छन्, “मेरो फेसबुक ह्याक गरिएको छ । कृपया कुनै पनि सन्देश या पोष्टको जवाफ नदिनु होला । किन भने उक्त पोष्टहरु मेरो टिमले गरेको होइन ।”
अभिनेत्री उर्वशीको फेसबुक अकाउन्ट ह्याकपछि केही पोष्टहरु गएका छन्, जहाँ अश्लिल सामग्रीहरु पोष्टहरु गरिएको छ । यस मुद्दामा कारबाही प्रक्रिया अगाडि बढाइएको मुम्बई पुलिसले जनाएको छ ।
यस विषयमा साइबर पुलिस सेलमा उजुरी दर्ता गरिएको जानकारी गराइएको छ । मुम्बई पुलिसले भनेको छ, “हामीले तपाईको उजुरीलाई साइबर पुलिस स्टेशनमा पठाएका छौं ।”
बलिउड अभिनेत्री तथा व्युटी क्वीन उर्वशी रौतेला सोसल मिडियामा निकै चर्चित छन् ।